من ذاكرة الطفولة زمان .

السبت - 07 نوفمبر 2026 - الساعة 11:45 ص بتوقيت العاصمة عدن

عدن "عدن سيتي" خاص

أتذكر لما كان أي أحد من أفراد العائلة في بريطانيا أو أي دولة يزور عدن ..

كانت تفاصيل هذه الزيارة تبدأ بإرساله طار (برقية) وتصل إلى مكتب كيبل أند وارليز الواقع في البنك المركزي في كريتر، وبدورهم يرسلوا لك إشعار عبر صندوق بريدك علشان تروح تستلم الطار من مكتبهم، أو يجيبوا ساعي البريد لما البيت.

بعد إستلام الطار الذي يوصل قبل ثلاثة أيام من قدوم المسافر، يبدأو الأهل في عدن يتجهزوا ويخططوا لهذه الزيارة فلان واجي وفين با نوديهوا يتمشى ومن ذي الهدرة..!! ليلة ما بايكون المسافر قادم، نتصل على الاستعلامات حق المطار علشان يشوفوا لنا بقائمة الواصلين هل أسم المسافر موجود!!

يوم وصول المسافر، يتجمعوا الأهل ويزكنوا على سيارتين إنجيز، ويكون القادم إلى عدن نفر واحد واللي يروحوا يستقبلونه ثمانية وثلاثين نفر 😜🤣 وكل واحد جالس فوق حزن الثاني داخل البابور، والأهل عاده بعضهم يعملوا سندوتشات تقول رايحين رحلة 🤣، وهاتلك يا هدرة وصياح ومدحاشة فوق البابور، وكل هذا التعب والمداحشة عشان نستقبل نفر واحد واجي من برع ولنا سنين ما شفناه، وهذا يدل على المحبة والترابط بين الأهل في عدن 💞

المهم نوصل المطار، وبرضه نروح نشوف اللسته حق القادمين بالطائرة اللي يعلقونه أصحاب المطار على الجدار علشان نتأكد أنه المسافر واجي ونكون مقشننين لما نشوف أسمه، وكان في تلك الفترة مسموح تشوف قائمة الواصلين أما الآن لدواعي أمنية ممنوع ..

المهم بعدها ساني نطلع إلى سقف المطار المكشوف كان ذيك الأيام في المطار القديم ونجلس نلعب ونتقفز فوق السقف منتظرين وصول الطائرة وكل دقيقتين ثلاث نتخاوص على مدرج المطار نتأكد من وصول الطائرة (مجرد شجن)😜🤣 لأنه كانت البشكة كله تروح المطار قبل ساعتين ثلاث ماناش داري ليش 🤔 والمصيبة أنه قد معانا خبر بتوقيت وصول الطائرة إلا أنه هذا الشيء والوصول بدري إلى المطار مشيكين ولابسين أحلى لبس نوع من أنواع الترفيه والترويح عن النفس 🤣🤣

المهم توصل الطيارة ونحنا فرحانين، ونجلس نتقفز ونتفرج هنا وهناك علشان نشوف المسافر القادم ونلمحه لأنه كان المسافر ينزل من الطيارة ويمشي رجل إلى الصالة، لانه مافيش كانت باصات تجيبهم ..

وأول ما نشوفه نشاور عله بيداتنا بفرحة غامرة لما يختفي على الأنظار وساني نهرول لما تحت خارج صالة الوصول علشان نحلق فيبه ونبوسه فرحانين بوصوله، والمسافر فرحان بهذه الطقوس والمحبة لأنه ما يحصله في البلاد اللي هو مقيم فيها وكل واحد يضارب يشتي يحمله الشنطة إلى داخل البابور 🤣🤣..

المهم تبدأ الزفة حق سيارات الإنجيز الأوبل أبو كعوب وإلا البيجوت فايف فايف فايف بالتحرك من المطار إلى البيت بنفس المداحشة والصياح داخل البابور مع زايد نفر أو نفرين من القادمين من السفر لما نوصل البيت🤣🤣🤣 .. يلا أتحفونا بأشياء من ذاكرتكم حول هذا الموضوع..

بلال غلام حسين