الرئيس مبارك ورهان الـ100 جنيه.. موقف إنساني لا يُنسى مع فرد شرطة في مدينة 6 أكتوبر
الأربعاء - 02 سبتمبر 2026 - الساعة 11:07 ص بتوقيت العاصمة عدن
مصر " عدن سيتي " القاضي أنيس جمعان
سنة ٩٦؛ الرئيس مبارك كان بيفتتح مجموعة مشروعات في مدينة ٦ أكتوبر.. وبعد ما خلص ركب عربية وساقها بنفسه وطلع ياخد جولة.. وكان راكب جنبه وزير الإسكان محمد إبراهيم سليمان.
وفجأة مبارك وقف بالعربية وشاور لواحد من أفراد الشرطة اللي بيأمنوا الموكب ونادى عليه واتكلموا حوالي أربع أو خمس دقايق.
المشهد اتعرض في التليفزيون.. وطبعا الدنيا اتكهربت في الداخلية وخصوصا في مكتب الوزير اللي كان عاوز يعرف إيه اللي خلى الرئيس يقف بعربية ويتكلم مع فرد الشرطة.. ويا ترى شاف خلل أمني ولا إيه؟!
الوزير حسن الألفي كلم مدير أمن الجيزة عشان يسأله فقاله إنه في مكان بعيد ومش قادر يعرف ليه الرئيس وقف ولا إيه اللي حصل بينه وبين فرد الشرطة.
وبعد نص ساعة قدر وزير الداخلية يكلم المهندس محمد إبراهيم سليمان، الوحيد اللي كان مع مبارك في العربية، واللي حكى لحسن الألفي اللي حصل..
سليمان قاله:
واحنا ماشيين بالعربية الريس شاورلي على مخبر واقف وقالي: تراهني إن المخبر ده ما فطرش؟.. أنا شايفه من ساعة ما دخلت الصبح وهو واقف فى الحتة المقطوعة دي وأكيد ما كلش أي حاجة..
وفعلا قرب منه وشاورله؛ فجه بسرعة وادى التحية العسكرية للريس اللي سأله: إنت فطرت النهاردة؟، فالمخبر اتلخبط ومعرفش يرد.. فمبارك قاله بحسم: قول الحقيقة.. إنت فطرت النهارده ولا لأ.. انت مابتردش ليه؟
الراجل رد: الصراحة يافندم.. أنا مفطرتش، وكنت مستني سيادتك الزيارة تخلص وبعدين أروح آكل.
مبارك سأله: إنت واقف هنا من إمتى؟
الرجل رد: من الساعة ستة الصبح.
مبارك سأله: إنت منين؟
فرد: من شبين الكوم يافندم.
وهنا ضحك الرئيس مبارك وقاله: من المنوفية، وساكن فين هنا؟
فرد: سيادتك أنا قاعد فى شبين الكوم وباجي وبارجع بالمواصلات، باشتغل 24 ساعة وباخد راحة 24 ساعة.
الرئيس سأله: وعندك عيال؟.. فقال: الحمد لله عندي أربع ولاد كلهم فى المدارس.
وقبل ما يمشي مبارك قاله: مش عاوز حاجة؟
فقال: والله يا فندم أنا نفسي فى شقة هنا فى مصر أجيب ولادي فيها بدال ما انا رايح جاي كل يوم من شبين الكوم.
الرئيس التفت لوزير الإسكان وقاله: شوف الموضوع ده، دبر شقة للراجل ده على طول…
وحكى محمد إبراهيم سليمان لوزير الداخلية وهو بيضحك: بعد ما مشينا الريس قالي: هات يا عم الـ100 جنيه الرهان اللي إنت خسرتوا.. مش قولتك الراجل ده ما فطرش.
رحم الله الرئيس مبارك وغفر له وتجاوز عن سيئاته.