قصة فنان مصري أبكتب الرئيس الاسبق أنور السادات..!! ( صور )

الإثنين - 15 ديسمبر 2025 - الساعة 05:14 ص بتوقيت العاصمة عدن

" عدن سيتي " متابعات

قصة فنان ابكتب الرئيس المصري الاسبق أنور السادات..!!

في يوم، السيدة جيهان دخلت على الرئيس السادات فلقت عينه مدمَّعة، فسألته: مالك يا أنور؟
ومن غير ما يرد شاورلها على الجرنان..

جيهان السادات ابتدت تقرأ فشافت خبر منشور عن فنان موت نفسه بعد ما ولاده اطردوا من المدرسة عشان ما دفعوش المصاريف!

والقصة إن الفنان عبد المنعم إسماعيل، اللي شارك في أكتر من 300 فيلم، المنتجين نسيوه ومحدش بقى يطلبه لأي شغل، وفضل من سنة 68 لحد سنة 70 ما بيخرجش من البيت، وصرف كل اللي معاه لحد ما فلِس تمامًا، وما قدرش حتى يدفع مصاريف المدارس لولاده.

ومن العجز والحزن رمى نفسه في النيل يوم 30 أكتوبر سنة 1970.

الرئيس السادات اتأثر جدًا باللي حصل، وطلب بحث اجتماعي عن أسرة الفنان عبد المنعم إسماعيل، وقدّملهم، في السر، معونة، وحددلهم مبلغ يوصلهم كل شهر.
وبعدها خد قرار بمعاشات استثنائية لأسر الفنانين اللي ماتوا وماسابوش حاجة لأسرهم، وكان هو بنفسه اللي بيراجع الحالات ويقرر المعاش الاستثنائي.

ولما مات الفنان إسماعيل يس، وماسبش أي شيء لولاده، عمل لأسرته معاش محترم.
لكن اتفاجئ، بعد شوية، بشكوى من أرملة المرحوم إنها ماصرفتش أي حاجة رغم مرور شهرين على قرار المعاش.

الرئيس السادات انفعل جدًا من وزير الثقافة اللي ما نفّذش القرار، واستدعاه وقاله:
"إذا ما كنتش عارف تنفذ القرار بتاعي للست وعيالها، اللي راجلها مات ومش لاقيين يعيشوا، أومال هتمشي الوزارة إزاي؟..
أنا مش عاوز أشوفك تاني"!

وبالفعل الوزير مشي مع إنه كان لسه يدوب ماسك المنصب.
واتصل السادات بأرملة إسماعيل يس واعتذرلها عن اللي حصل، وقال لها: "حقك عليّا.. المعاش هيوصلك من أول الشهر، وبأثر رجعي".

رحم الله الرئيس السادات وغفر له.