السيسي يكتشف الكنز الكبير ويقرر ترويق الشعب المصري
الأربعاء - 11 نوفمبر 2026 - الساعة 10:57 م بتوقيت العاصمة عدن
عدن سيتي _متابعات
مصر هتعوم على الغاز.. والدولار سعره هيبقى في الأرض.. والحاجة هتبقى برخص التراب الفترة الجاية.. ومرتبات المدرسين والدكاترة والممرضين هتبقى خيالية.. ومفيش قطع كهربا تاني.. ولتر البنزين هيثبت ومش هيطلع تاني.. وبتوع الريف هيعيشوا فعلًا حياة كريمة.
👇
السيسي يكتشف الكنز الكبير ويقرر ترويق الشعب المصري
👇
كنز جديد اكتشفه الرئيس السيسي، عبارة عن حقول غاز وبترول في مناطق متفرقة في مصر، والحكومة شغالة عليها في سرية تامة، والتحرك بدأ على الأرض عشان الحقول تدخل الخدمة في أسرع وقت.
والهدف توفير احتياجات محطات الكهربا، وده معناه إن مفيش انقطاع للكهرباء من هنا ورايح.. يعني بيوت مصر هتبقى كلها منورة بفضل الله وبأمر السيسي.
والحاجة التانية والمهمة إن سعر الكهربا اللي كان بيطلع الفترة اللي فاتت هينزل الفترة الجاية وهيبقى في متناول الجميع، يعني محدش هيشتكي من الفاتورة من هنا ورايح.
وسعر لتر البنزين مش هيزيد تاني، والكلام الفترة الجاية على إنه يرجع تحت الـ15 جنيه.
أما بقى الجزء الأهم واللي هينقل مصر في حتة تانية فهو التصدير؛ لأن كمية الغاز والبترول مش طبيعية.
وده هيخلي مصر تصدر زي دول الخليج، يعني الدولار هيبقى متوفر في مصر زيه زي الجنيه، ويمكن أرخص كمان، وده هيخلينا نسد الديون اللي علينا في وقت أسرع من المتوقع.
ولما ده يحصل، الأسعار هتنزل تاني، والأكل والشرب هيبقوا بسعر التراب، يعني كله هياكل اللي نفسه فيه ومحدش هيتحرم من حاجة.
كيلو اللحمة سعره هينزل تحت الـ400 جنيه، والفراخ وجميع أنواع البروتين سعرها هينزل للنص، وأسعار زمان هترجع تاني، والتاجر اللي هيغلي على المواطن على السجن فورًا، وسعر رغيف العيش هينزل لأكتر من نص تكلفته الحقيقية.
ودي الهدية اللي الرئيس محضرها للشعب، عشان هو حاسس بالمصريين، وقال إن الشعب صبر واستحمل كتير الفترة اللي فاتت، وآن الأوان إن الحكومة ترد له الجميل.
وعشان كده هيبدأ بالمرتبات.
أولًا، دكاترة الجامعات هتتظبط ومرتباتها هترتفع بنسبة محترمة تخليهم يقدروا يعيشوا مرتاحين.
وعلى نفس الخط، المدرسين هياخدوا النصيب الأكبر من الزيادة، ومش هيبقوا محتاجين يدوا دروس خصوصية عشان يحسنوا الدخل ويعيشوا حياة كريمة.
أما بقى الدكاترة والممرضين، فدول الرئيس وصّى عليهم جامد، ومرتباتهم هتزيد بشكل خيالي، وكمان الحوافز والمكافآت هتبقى مغرية جدًا، والمستشفيات اللي شغالين فيها كلها هتتطور، والمنظومة الصحية هتتعدل من أول وجديد، والهدف منها، زي ما الرئيس بيقول:
“صحة المصريين رقم واحد”.
وطالما بقى جبنا سيرة حياة كريمة، فالرئيس أمر إن قرى الأرياف كلها تكون فيها كهربا، ومفيش حاجة اسمها شارع مش متسفلت هناك، يعني الشوارع كلها هتبقى زي المدينة بالظبط، وشبكات الغاز اتمدت، والأوامر إنها توصل لكل البيوت، والمستشفيات هناك تشتغل على أعلى المستويات ويتوفر لها كل الأجهزة والمعدات الحديثة.
يعني مفيش طوابير انتظار تاني عشان الكشوفات والعمليات، والعلاج سعره ينزل، والمواطن اللي يدخل بروشتة للصيدلية يقدر يصرفها كلها.
والبنية التحتية خدت النصيب الأكبر من التطوير، يعني النت لازم يبقى موجود وفي كل بيت، وشبكات الصرف الصحي كلها هتتعدل من أول وجديد.
والمدارس كمان هيتم تطويرها وعلى أعلى مستوى، والفصل هيكون فيه عدد مناسب من الأطفال عشان تعرف تتعلم صح وتستفيد، ومستوى التعليم أساسًا داخل المدرسة هيبقى زي أوروبا كده.
وده اللي الدولة شغالة عليه دلوقتي، يعني حجم المشروعات اللي هتتعمل هيعدي الـ200 مليار جنيه.
وكل اللي شاغل الرئيس من دلوقتي لـ2030 إنه إزاي يدلع الشعب المصري ويكافئه على الصبر وإنه اتحمل فترة صعبة جدًا.
وربنا يحفظ مصر وشعبها من كل شر.