فيليب دوك.. ورحيل الشاب الذي أحب «ملكة الكون» قبل التاج
السبت - 29 أغسطس 2026 - الساعة 05:08 م بتوقيت العاصمة عدن
عدن سيتي _متابعات
وقت توجّت جورجينا رزق بلقب ملكة جمال الكون سنة 1971، كانت كل الأنظار عليها، بس كان في شاب اسمه فيليب دوك حاضر بحياتها من قبل الشهرة بسنين.
فيليب كان بعمر الـ19 تقريباً، وكان صديق جورجينا المقرب من أيام المراهقة، والعلاقة بيناتهم ما كانت وليدة اللحظة اللي صارت فيها ملكة جمال الكون..
بالعكس، كانوا بيعرفوا بعض من قبل، وكان فيليب معروف وقتها بين الشباب ببيروت، خصوصاً من خلال الموسيقى والرياضة.
فيليب كان عضو بفرقة The Control الموسيقية سنة 1967، وهي فرقة كانت بتقدم موسيقى الـBlues والـProgressive Blues، وكان هو عازف الدرامز فيها..
الفرقة كانت تضم نزيه مسلّم، عامر مكي، إيف شلالا وأمين مردم بك، وكانت جورجينا تحضر حفلات الفرقة بشكل دائم.
يعني قصة جورجينا وفيليب بلشت قبل التاج، وقبل السفر واللقاءات العالمية، وقبل ما تصير حياتها محط أنظار الناس.
الكاتب والإعلامي ريكاردو كرم، بيحكي قصة بتظهر قديش كان فيليب قريب من جورجينا بهديك المرحلة.
بعد تتويج جورجينا ملكة جمال الكون، سافرت بجولة طويلة حول العالم، والتقت خلالها ملوك وأمراء وشخصيات سياسية وفنية، وصارت محط اهتمام أينما راحت.
بس بحسب الرواية اللي نقلها ريكاردو كرم عن الصحافية الراحلة نهاد عازار، اللي رافقت جورجينا خلال جولتها، كانت الملكة الشابة تشتاق للبنان ولصديقها القديم.
ويقال إنها كانت أحياناً تصحى بالليل وتقول لنهاد إنها بدها ترجع على لبنان لأن فيليب ناطرها..
حتى إن قصة الحب بينهما دخلت الثقافة الشعبية وقتها، وانعملت أغنية بتتغنى بعلاقتهما، ومن كلماتها الشهيرة: «جورجينا عندها حبيب... أطيب من رز بحليب.. يا نيالك يا فيليب.. ما تلبس الا بروتال»..
ومن المواقف الطريفة بينهم يوم رجعت جورجينا إلى لبنان بعد تتويجها، وكانت الدولة والإعلام والصحافة عم يستقبلوا ملكة جمال الكون.
فيليب حاول يكون موجود بالمؤتمر الصحافي الأول إلها، بس المفاجأة إنهم منعوه من الدخول.
السبب كان لبسه وشعره. كان شعره أطول من المقبول بهديك الفترة، وملابسه اعتُبرت غير مناسبة، فبقي الشاب اللي كانت جورجينا بتحبه خارج الباب، بينما الصحافة كلها كانت جوّا بانتظار ملكة جمال الكون..
ويمكن هالمشهد تحديداً بيختصر الفرق الكبير اللي صار بحياة كل واحد فيهم خلال فترة قصيرة..
فيليب كان الشاب اللي بيعرف جورجينا قبل الشهرة، وفجأة صار مطلوب منه يوقف برا، بينما هي صارت واحدة من أشهر النساء بالعالم..
ومع مرور السنين، أخدت حياة جورجينا وفيليب مسارات مختلفة، وما بقيت قصتهما بالشكل نفسه اللي كانت عليه أيام الشباب..
جورجينا كملت حياتها وتزوجت لاحقاً، وفيليب كمان بنى حياته الخاصة، وتزوج من نجاة ناصر دوك، وكان عنده ابنه مايكل..
ولكن فيليب ما كان مجرد اسم مرتبط بقصة جورجينا فقط. فيليب عاش ببيروت، وكان رياضي وبيحب الموسيقى، وبعد سنوات صار عنده نادي Backstreet بشارع مكحول، واللي ارتبط بذاكرة الحياة الليلية ببيروت وبمرحلة كاملة من تاريخ المدينة..
واليوم، وسط زحمة الأحداث، رحل فيليب دوك عن عمر حوالي 74 سنة، يوم 25 آب 2026، بعدما عاش سنواته الأخيرة بعيداً عن الأضواء.
وأُقيمت الصلاة لراحة نفسه في كنيسة القديس بولس للاتين في الفنار..
رحل فيليب، وبقيت قصته مع جورجينا واحدة من حكايات بيروت القديمة، من وقت كان الحب فيها يبدأ من المدرسة والحفلات والمباريات، قبل ما تغيّر الشهرة حياة أصحابها إلى الأبد..