سنة 1974، كانت أول مرة وليد توفيق يشوف فيها جورجينا رزق
الخميس - 13 أغسطس 2026 - الساعة 07:40 ص بتوقيت العاصمة عدن
لبنان " عدن سيتي " متابعات
سنة 1974، كانت أول مرة وليد توفيق يشوف فيها جورجينا رزق، بس المشهد ما كانش عادي أبداً. وليد كان وقتها رايح على مصر لأول مرة بحياته، وكان بعده ببداياته..
أول ما طلع على الطيارة، لقى سجادة حمرا وورود وحركة كبيرة من طاقم الطائرة. فكر للحظة إن كل هالاستقبال إلو، خصوصاً إنها كانت أول سفرة على مصر.
بس بعد شوي سمع المضيفات عم يقولوا: «الملكة وصلت».
وقتها اكتشف إن ملكة جمال الكون لعام 1971، جورجينا رزق، كانت راكبة نفس الطيارة..
وليد كان مع المنتج حسين الصباح يلي شجّعه يروح يسلّم عليها، بس وليد تردّد وقال بمعنى كلامه: «بتطلع فيي؟ أنا بعدني غلبان».
ولما وصلوا مطار القاهرة، شاف بعينه الفرق بينه وبين جورجينا. الصحافة كانت ناطرتها بالمطار، وكل الاهتمام كان رايح عليها، بينما هو ما كان حدا تقريباً منتبه لوجوده.
وقتها ما كان في قصة حب ولا حتى معرفة حقيقية بيناتهم. جورجينا كانت بمرحلة مختلفة تماماً من حياتها..
وبعد فترة تزوجت من علي حسن سلامة، وأنجبت منه ابنها علي. وبعد رحيل سلامة غدرا، ابتعدت جورجينا عن الأضواء وركّزت على تربية ابنها.
وبعد سنوات، تغيرت حياة وليد كمان، وصار اسمه معروف أكتر بالفن. لحد ما انعرض عليه يعمل فيلم مع جورجينا، فسافر مع المنتج إلى باريس ليلتقي فيها..
وهون كانت المفاجأة. وليد كان متوقع يلاقي ملكة جمال الكون عايشة بقصر، لكنه لقاها بشقة متواضعة مساحتها حوالي 100 متر، ومع ابنها علي..
وهي نفسها ما كانت مهتمة ترجع للسينما، ورفضت المشروع لأنها كانت بدها تكرّس وقتها لتربية ابنها..
وليد قال لاحقاً إن هاللقاء خلاه يشوفها بطريقة مختلفة، بعيداً عن صورتها كملكة جمال ونجمة سينمائية..
بعدها رجعوا التقوا مرة تانية، وبحسب رواية وليد، كانت سنة 1984 بباريس، قبل ما يلتقوا مجدداً في الشام..
وهناك بدأت العلاقة تاخد منحى مختلف، وتحولت الصداقة لحب. وليد قال إنهم التقوا لفترة حوالي شهر، وإنه تعلّق فيها بشكل كبير..
حتى إنه لما رجع على لبنان حاول يبعد عنها، بس ما قدر يكمل فترة طويلة، وكانت أغنية «إنتِ الشمس» من الأغاني اللي ارتبطت بهالمرحلة من حياته..
وبعدها سافروا سوا على باريس، وتطورت العلاقة أكتر، لحد ما قرروا يتزوجوا عرفياً..
وهون في اختلاف بين تصريحات وليد على مر السنين حول التاريخ بالتحديد، لكن المؤكد بحسب كلامه إنه استمر الزواج العرفي حوالي سبع سنين، قبل ما يعلنوا زواجهم رسمياً سنة 1991. وليد وصف هالفترة بأنها كانت أشبه بشهر عسل طويل.
وخلال هالفترة، ما كانت جورجينا مجرد زوجة وليد، هو كمان تعامل مع ابنها علي كأنه ابنه، وبقيت هي بعيدة عن الأضواء رغم العروض اللي كانت توصلها..
وليد حكى كمان إن جورجينا تلقت عروض زواج من رجال أثرياء، وبعضهم كان عنده طائرات خاصة، لكنها رفضت هالعروض واستمرت بعلاقتها معه..
واليوم، بعد كل هالسنين، قصة وليد وجورجينا بتضل غريبة شوي إذا رجعنا لأول مشهد بينهم.. البنت اللي كان ما يحلم حتى يسلم عليها.. بتصير زوجته