♦♦ واحدة من أنبل القصص اللي ممكن تسمعها في حياتك هي قصة إسماعيل شبانة أخو عبد الحليم حافظ..
الإثنين - 02 يونيو 2025 - الساعة 03:59 ص بتوقيت العاصمة عدن
مصر " عدن سيتي " جورج بشير
✦ كتير كانوا بيقولوا إن إسماعيل شبانة كان صاحب صوت جميل، يمكن أجمل من عبد الحليم نفسه، بس الحظ مكانش معاه، والساحة كانت خلاص اتملت بنجم كبير اسمه عبد الحليم حافظ.
✦ بعد أسبوعين بس من وفاة عبد الحليم حافظ، جريدة نشرت مقال تحت عنوان «الآن يغنى إسماعيل شبانة»..
✦ كاتب المقال قال إن إسماعيل، اللي هو أخو عبد الحليم الكبير، كان عنده صوت أقوى وأجمل بكتير من الفنان الراحل، بس لما عبد الحليم ظهر خد الساحة لحسابه وبقى هو النجم الأول، و إسماعيل اتوارى واختفى تقريبا من الساحة، ومعندوش غير شوية أغاني سجلهم للإذاعة والتليفزيون كده كل فين وفين.
✦ الكاتب كمل كلامه وقال إن موت عبد الحليم فتح الباب لإسماعيل إنه يرجع يغني تاني، بعد «سنين الحرمان الإجباري» زي ما سماها..
لكن لما إسماعيل قرأ الكلام ده اتنرفز جدا، ومسك الجرنال وقطعه بإيده، وحلف وقتها إنه مش هيغني تاني..
✦ وفعلا أعلن اعتزاله ورفض كل محاولات القريبين منه والمهتمين بالموسيقى اللي حاولوا بيها يرجعوه، لحد ما توفاه الله سنة 1986، وهو بعيد تماما عن الأضواء.
✦ الأكثر إدهاشا من ده كله إن حب إسماعيل لأخوه كان كبير قوي وابتدا من أول ولادته
بعد ما اتولد عبد الحليم بأسبوع أمه ماتت، وساعتها إسماعيل كان لسه طفل، وسمع ستات من الجيران بيتكلموا كلام غريب كده كأنهم بيخططوا لحاجة،
✦ واحدة فيهم قالت: يقعد يعمل إيه بعد المرحومة؟ لازم نلاقي له حل.
✦ ردت عليها التانية وقالت: ده إحنا نرحمه من الجوع واليتم.
✦ وجت التالتة وقالت: نرضّعه منها، يموت زيها وخلاص.
✦ إسماعيل اتخض وجري على أبوه بسرعة وحكاله كل اللي سمعه.
أبوه أول ما سمع الكلام وشه احمر وقاله: ستات إيه؟ فين دول؟
✦ وخرج وعينيه بتطق شرار وراح للستات وقاللهم بصوت عالي:
عبد الحليم ده ابني، وأنا اللي هربيه بإيدي. أمه ماتت بقضاء ربنا، ده أجل ومكتوب،
ولو واحدة فيكو فكرت تمسه أو تقربله، أنا هبلّغ النيابة فورا..
✦ وكمان كانت في أزمة كبيرة في رضاعة عبد الحليم، لأن أمه ماتت بعد الولادة على طول ومكانش في حد يرضعه.
إسماعيل وقتها مسكتش ولف بيوت قرية الحلوات بيت بيت، يدور على ست لسه والدة قريب علشان ترضع أخوه الصغير.
✦ كل واحدة منهم كانت تستقبله هو وعبد الحليم بترحاب كبير تاخده في حضنها وترضعه، وهي بصة لإسماعيل بنظرة فيها شفقة وحنية، وهو قاعد ساكت مستني أخوه يخلص.
✦ وبالفعل عبد الحليم رضع من أكتر من 200 ست من ستات الحلوات.
إسماعيل الله يرحمه كان راجل نبيل وسند حقيقي لأخوه وقدر يتغلب على ضعف النفس البشرية اللي ممكن تخليك حاقد على أقرب الناس ليك علشان حاسس إنك أحق بشيء معين منهم وإنك مظلوم...